د پژواک خدمتونه

د انځورونو څانګه

د پيغام له لارې خبري خدمتونه

د دغو خدمتونو د وړاندې کولو موخه دا ده ، تر څو د ګرځنده ټيلېفونونو له لارې په دوامداره توګه خلک خبرونو ته لاسرسى ومومي او هيلې يې ترسره شي. پژواک غواړي د خبرونو خپرولو په برخه کې خپل مسلکي مهارتونه او تجربې له ټيلېفوني شبکو سره شريکې کړي او له دې لارې وکړای شي ډېرو برخه والو ته په اغېزمنه بڼه خپل خدمتونه ورسوي.

د ګډون وړانديز
د انګليسي خبرونو لپاره ګډون: Send 83 to 824
د دري خبرونو لپاره ګډون: Send 84 to 824
د پښتو خبرونو لپاره ګډون: Send 85 to 824

د ټاکنو خبري پوښښ

د کانونو په اړه ځانګړې پاڼه

د رسنيزو خبرتياوو خدمتونه

د پژواک د سوداګريزو اعلانونو خدمتونه

دګرځنده ټيلېفون اپلکېشېن

Daily Newsletter

Language
Sending Time (GMT / Kabul time)

نیول شوي زمریان په کندهار کې د ژوبن لپاره له سوېلي افریقا راوړل شوي

نیول شوي زمریان په کندهار کې د ژوبن لپاره له سوېلي افریقا راوړل شوي

Apr 02, 2017 - 15:58

کندهارښار (پژواک، ١٣ ورى ٩٦): يو سوداګر ادعا کوي چې په کندهار کې نیول شوي زمریان يې له سوېلي افریقا څخه راوړي او په دې کې د قاچاق موضوع شامله نه ده.

دوه ورځې مخکې د کندهار امنیتي چارواکو خبر ورکړی و چې د دغه ولایت په سپین بولدک ولسوالۍ کې یې هغه ۶ زمریان نیولي چې پاکستان ته وړل کېدل.

دوی ویل، دغه زمریان د افغانستان په ځنګلونو کې نیول شوي او د سپین بولدک له لارې پاکستان ته قاچاق کېدل.

خو يو سوداګر وايي چې زمریان یې په سوېلي افریقا کې نیولي او په قانوني توګه یې د یوه ژوبڼ جوړولو لپاره هېواد ته راوړي دي.

محمد داوود فراهي چې ځان د زمریانو څښتن او یو سوداګر ښيي، پژواک خبري اژانس ته اړوند اسناد هم وښودل.

نوموړي وویل، غوښتل یې په کندهار کې یو ژوبڼ جوړ کړي او د همدې لپاره یې له سوېلي افریقا ۶ زمریان چې درې زمري او درې زمریانې دي، په قانوني توګه هېواد ته راوړي دي.

ده زیاته کړه، مخکې له دې چې دغه زمریان هېواد ته وارد کړي، کندهار ولایت مقام ته یې عریضه کړې وه او د دغه کار لپاره یې قانوني جواز هم جوړ کړی دی چې اړوندو ټولو ادارو ورسره موافقه کړې ده.

دی وايي، په همدغه بنسټ یې زمریان په سوېلي افریقا کې په ۱۲زره ډالر پېرلي او بیا یې د متحده عربي اماراتو له لارې کابل ته راوړي چې هر زمری خپل پاسپورټ لري او ده یې قانوني مالیه او نور اړوند حسابونه هم خلاص کړي دي.

د ده په خبره، وروسته یې زمریان د کابل له هوايي ډګر څخه کندهار ته راوړل، دا چې په رالېږدولو کې یې ډېر وخت لګېدلی و نو د زمریانو نوکانو لنډولو او واکسین ته اړتیا وه.

فراهي وویل، دا چې په کندهار کې په دې برخه کې مسلکي ویترنر نه موندل کېده، پرېکړه یې وکړه چې زمریان سپین بولدک ته ولېږدوي او د کرښې له هغې غاړې ورته مسلکي ویترنر ډاکتر را وغواړي، څو هم یې نوکان لنډ کړي او هم ورته واکسین وکړي.

خو دی وايي، هلته په رسېدو سرحدي پولیسو زمریان ونیول او رسنیو ته یې وویل چې ګواکې دغه زمریان د افغانستان په ځنګلونو کې نیول شوي او پاکستان ته په ناقانونه توګه قاچاق کېدل.

نوموړي رد کړه چې ګواکې دغه زمریان دې پاکستان ته قاچاق کېدل.

د ده په خبره، په دې اړه یې د ولایتي ادارې چارواکو ته خپل اسناد هم ښودلي دي.

نوموړی غوښتنه کوي چې د ده قانوني اسنادو ته په کتو دې زمریان بېرته ده ته وسپارل شي.

دی زیاتوي، په ٢٤ ساعتونو کې د دغو ۶ زمریانو خوراک شاوخوا ۱۰زره افغانۍ لګښت لري، دا چې زمریان له امنیتي ځواکونو سره دي، نو دی وېرېږي چې هسې نه ناروغ یا تلف نه شي.

د کندهار د والي ویاند صمیم خپلواک هم پژواک ته وویل، یاد کس ولایت مقام ته مراجعه کړې او خپل اسناد یې له دوی سره شریک کړي دي.

ده زیاته کړه، ولایتي اداره اړوند اسناد څېړي او وروسته یې په اړه پرېکړه کوي.

نوموړي هم ومنله چې د اسنادو له مخې داسې ښکاري چې دغه زمریان له سوېلي افریقا څخه راوستل شوي دي.

د یاودنې ده، په افغانستان کې د وحشي ژوو واردول یا پېر او پلور معمول نه دی.